رێنمایێن گرنگ بۆ مامۆستایان دەمێ راستڤەکرنا پەڕەیێن (تێنوسێن) ئەزموونان

دڤێت ل سەر هەر بڕگە یان پرسیارەکێ نیشانەکا دیار هەبیت بۆ بەرسڤا دروست و بۆ بەرسڤا خەلەت. چێنابیت چو بڕگە بێی نیشانە بهێنە هێلان دا کو لژنا هویربینیێ پشتڕاست بیت کو هەمی بەرسڤ هاتینە هەلسەنگاندن.

دەمێ نمرە ل سەر هەر پرسیارەکێ دهێتە دانان، دڤێت هەم ب ژمارە (بۆ نموونە: 3/4) و هەم ب نڤیسین (بۆ نموونە: Three) ل بن نمرێ بهێتە دیارکرن. هەروەسا پێدڤیە مامۆستا واژوویا خۆ ل ژێر هەر نمرەیەکێ بکەت. ئەڤ کارە دهێتە ئەنجامدان دا کو چ گوهۆڕین یان خەلەتی د نمرەیان دا دروست نەبن.

• پێدڤیە ناڤێ مامۆستایێ بابەت ب شێوەیەکێ سیانی و ڕوون ل بن هەر پەڕەیەکێ ئەزموونێ هەبیت.
• ل سەر هەر پەڕەیەکێ، دڤێت مامۆستا واژوویا (Signature) خۆ ل بن هەر بازنەیەکێ نمرەیێ بکەت. ئەڤ چەندە بۆ پشتڕاستکرنا بەرپرسیاریەتیا زانستی و فەرمی یا مامۆستایە ل سەر هەر نمرەیەکا دهێتە دانان.

• نمرەیا گشتی بۆ هەر پرسیارەکێ دڤێت ب ڕوونی و د ناڤ بازنەیەکێ دا بهێتە دانان.
• بۆ نمرێن لاوەکی (فرعی)، مەرج نینە د ناڤ بازنەیێ دا بن و دروستە ب تنێ وەک ژمارە ل رەخ هەر فرعەکێ بهێنە نڤیسین.
• دڤێت نمرەیا د ناڤ بازنەیێ دا (کۆمێ پرسیارێ) ب تەواوی دگەل نمرێن لاوەکی یێن وێ پرسیارێ بگونجیت.

• ئەگەر مامۆستا د دەمێ نمرەدانانێ دا تووشی هەر خەلەتیەکێ بوو، دڤێت ب قەلەمێ سور خەلەتیا خۆ راستڤە بکەت.
• نابیت مامۆستا خەلەتیا خۆ ب قەلەمێ شین یان ب کێشانا چەند خەتێن زێدە و بێسەروبەر (شەخپەکرن) چارەسەر بکەت.
• دڤێت نمرەیا خەلەت ب خەتەکێ سادە بهێتە کێشان و نمرەیا دروست ب رەنگەکێ پاقژ و دیار ل رەخ بهێتە نڤیسین دا کو لژنا هویربینیێ ب ساناهی تێ بگەهیت.

• دڤێت ژمارە و نڤیسینا وان (کیتابی) ب ئێک زمان بن (بۆ نموونە هەردوو ب ئینگلیزی).
• چێنابیت نمرە ب زمانەکێ بهێنە نڤیسین و نڤیسینا وان ب زمانەکێ دی بیت، ژبەر کو هندەک ژمارە وەک (٠ و ٥) د ناڤبەرا زمانان دا تێکەل دبن و دشێن ب ساناهی بهێنە گوهۆڕین.

• بۆ نمرەیا کۆم یا هەر پرسیارەکێ و کۆمێ گشتی، ب چو شێوەیان چێنابیت نمرەیا نیڤ بهێتە دانان.
• ب تنێ د نمرەیێن لاوەکی (فرعی) دا دروستە نمرەیا نیڤ بهێتە دانان.
• ئەگەر نمرەیا پرسیارێ ب شکەستی (نیڤ) ما، دڤێت مامۆستا نمرەیا تەمام و دروست د ناڤ بازنەیێ دا بنڤیسیت بێی نیڤ.

• نیشانێن ل سەر تێنوسێ: ئەگەر قوتابی نڤیسینەکا زێدە، نوتەک، یان هەر نیشانەکا گوماناو ل سەر تێنوسا خۆ نڤیسیبیت، دڤێت مامۆستا بەری راستڤەکرنێ لژنا ئەزموونان ئاگەهدار بکەت.
• رێگری ل غەشێ: ژبەر کو هندەک جاران ئەڤ نڤیسینە وەک "غەش" (کۆد) دهێنە هەژمارتن؛ ئەگەر مامۆستا بێی پرس راستڤە بکەت، بەرپرسیاریەتیا یاسایی دکەڤیتە سەر ملێن وی.
• جهێن ڤالا: دڤێت هەمی بەرسڤێن ڤالا ب نیشانا خەلەت بهێنە دیارکرن دا کو دیار بیت مامۆستای هەمی نڤیسینێن د ناڤ تێنوسێ دا راستڤەکرینە.

• خشتەیێ لژنا راستڤەکرنێ: پێدڤیە ئەڤ خشتەیە ب تەمامی بهێتە پڕکرن. ئەگەر چەند مامۆستا پشکدار بن د راستڤەکرنێ دا، دڤێت ناڤ و واژوویا هەمییان تێدا بیت. ئەگەر ب تنێ ئێک مامۆستا بیت، دڤێت ناڤ و واژوویا خۆ ب تنێ تێدا بنڤیسیت. ب چو ڕەنگان نابیت ئەڤ خشتەیە ڤالا بمینیت.
• خشتەیێ لژنا هویربینیێ: ئەڤ خشتەیە ب تنێ یێ لژنا هویربینیێ یە؛ مامۆستایێن بابەت ب چو ڕەنگان نابیت چو نڤیسینان تێدا بکەن.

• نڤیسینا قوتابی: هەمی قوتابی دڤێت ب قەلەمێ رەساس (قورقوشم) بەرسڤێ بدەن.
• نڤیسینا مامۆستایی: مامۆستا دڤێت قەلەمێ جاف یێ شین یێ ئاسایی بۆ راستڤەکرن و نمرەدانانێ بکاربینیت.
• حالەتێن دەگمەن: ئەگەر قوتابیەکێ ب قەلەمێ شین بەرسڤ دابیت، پێدڤیە مامۆستا قەلەمێ جاف یێ رەش بکاربینیت دا کو نڤیسینا وی ژ یا قوتابی جودا بیت.
• ڕەنگێن قەدەغە: ب چو ڕەنگان ناهێتە قەبوولکرن قەلەمێ سۆر یان کەسک د ناڤ تێنوسان دا بهێتە بکارئینان.

• ل ژێر چو بارودۆخان مامۆستا نابیت نمرەیا کۆمێ گشتی (total mark) ل سەر بەرگێ تێنوسێ (د ناڤ بوکسا نمرەیان دا) بنڤیسیت بۆ ئەو بابەتێن پراکتیکی دگەل دا هەین.
• مامۆستا ب تنێ نمرەیێن بەشێ تیۆری یێن هەر پرسیارەکێ د ناڤ بازنەیان دا و دناڤ بوکسا نمرەیان دا دێ دانیت.
• نمرەیا کۆمێ گشتی دێ ژ لایێ لژنا ئەزموونان ڤە هێتە دانان پشتی نمرەیا پراکتیکی دگەل نمرەیا تیۆری دهێتە کۆمکرن.

• Corrector Signature: مامۆستایێ بابەت (راستڤەکەر) ب تنێ د ڤێ خانەیێ دا واژوویا خۆ دکەت ل ڕەخ هەر نمرەیەکا وی دانای.
• Checker Signature: ئەڤ خانەیە ب تنێ یا لژنا هویربینیێ (لجنة التدقیق) یە؛ مامۆستایێ بابەت ب چو ڕەنگان نابیت چو نیشانە یان واژوویا تێدا بکەت.
• پاتەکرنا واژوویێ: دڤێت واژوویا مامۆستای ل دویڤ نمرەیا هەر پرسیارەکێ هەبیت دا کو ڕاستی و دروستییا نمرەیێ ب فەرمی بهێتە ناسین.